ఉపాధి పనికెళ్తే.. ఇంట్లో సొమ్ము మాయం

తాళం వేసిన ఇంట్లో చోరీ
– గణపురంలో ఘటన
స్పాట్ వాయిస్, గణపురం: ఉపాధి పనికి వెళ్తే..దుండగులు ఇంట్లో దాచుకున్న సొమ్ము ఊడ్చుకెళ్లారు. ఈ ఘటన జయశంకర్ భూపాలపల్లి జిల్లా గణపురం మండలంలో చోటు చేసుకుంది. విశ్వసనీయ సమాచారం మేరకు..  గణపురం గ్రామపంచాయతీ పరిధిలోని కొత్తపల్లి గ్రామంలో గుండ్ల సమ్మక్క కుటుంబ సభ్యులంతా బుధవారం ఉదయం తన ఇంటికి తాళం వేసి మండల కేంద్రంలో జరుగుతున్న ఉపాధి పనులకు వెళ్లింది. మధ్యాహ్నం పని ముగించుకొని ఇంటికి వచ్చేసరికి తాళం పగులగొట్టి ఉండటంతో ఇంట్లోకి వెళ్లి పరిశీలించగా ఇంట్లో వస్తువులు చిందరవందరగా పడి ఉన్నాయి. అనుమానం వచ్చి పరుపుకింద దాచుకున్న లక్ష రూపాయలు ఉన్నాయా లేదా పరిశీలించగా డబ్బులు కనిపించలేదు. దీంతో చోరీ జరిగినట్లు గుర్తించి పోలీసులకు ఫిర్యాదు చేసినట్లు తెలిసింది.