కిష్టయ్య త్యాగం.. అజరామరo..

కిష్టయ్య త్యాగం.. అజరామరo..

జీవితం అంటే ఓ ప్రయత్నం, సమాజం అంటే ఓ ఆశయం. కానీ కొన్ని సందర్భాల్లో, ఈ రెండు విలువల కోసం వ్యక్తిగత జీవితం త్యాగం చేయాల్సి వస్తుంది. తెలుగు గడ్డ మీద అటువంటి మహోన్నత త్యాగం కానిస్టేబుల్ కిష్టయ్యది. ఆయన త్యాగం ఆరు దశాబ్దాల తెలంగాణ ప్రజాస్వామ్య ఆకాంక్ష సఫలీకృతం కావడానికి చోదక శక్తి లా పనిచేసింది

పుట్టకొక్కుల కిష్టయ్య 1972 సంవత్సరంలో

శివాయిపల్లి గ్రామం, రాజంపేట్ మండలం, ప్రస్తుత కామారెడ్డి జిల్లా లో పేద ముదిరాజ్ కుటుంబంలో జన్మించారు.2009లో, కేసీఆర్ ఆమరణ దీక్షతో మలిదశ తెలంగాణ ఉద్యమం మరింత ఉధృతమైంది. ఆ సమయంలో ప్రజలు, నాయకులు తెలంగాణ రాష్ట్రం కోసం గళమెత్తగా, ప్రభుత్వ నిర్లక్ష్యాన్ని చూస్తూ బాధ పడుతున్న కిష్టయ్య, తాను ఒక పోలీసు అయినప్పటికీ, ప్రజల తరఫున నిలబడాలని నిర్ణయించుకున్నాడు. తెలంగాణ ప్రాంతంలో జరుగుతున్న అన్యాయాలు అతని హృదయాన్ని కలచివేసాయి.అయన 1 డిసెంబర్ 2009న, తెలంగాణ ప్రజల కోసమే తన జీవితాన్ని అర్పించాడు. తన రక్తంతో ఉద్యమానికి ఒక కొత్త దిశ చూపించాడు.

ప్రజాస్వామ్య పోరాటాలకు ప్రతిధ్వని

కిష్టయ్య త్యాగం ప్రపంచవ్యాప్తంగా ప్రజాస్వామ్యం కోసం పోరాడిన అనేక సంఘటనలను గుర్తు చేస్తుంది..గాంధీ అహింసా మార్గంలో స్వతంత్ర భారతదేశం కోసం ప్రజలను ఏకం చేశాడు. గాంధీ దీక్షలతో ప్రజలు సామూహికంగా ముందుకు వచ్చి బ్రిటిష్ పాలనను ఎదిరించారు. కిష్టయ్య కూడా సత్యం కోసం తన ప్రాణాలను అర్పించడం ద్వారా ప్రజాస్వామ్య పోరాటాలకు మద్దతు తెలిపాడు.

మార్టిన్ లూథర్ కింగ్, రోసా పార్క్స్ లాంటి నాయకులు అమెరికాలో నల్లజాతీయుల హక్కుల కోసం పోరాడినప్పుడు, ప్రజాస్వామ్య విలువలు అత్యంత ముఖ్యమని ప్రపంచానికి తెలియజేశారు. కిష్టయ్య తన ప్రాంత ప్రజల హక్కుల కోసం నిలబడినప్పుడు, ఈ ఆత్మీయత ప్రపంచ పోరాటాలకు ప్రతిధ్వనిగా మారింది.

నెల్సన్ మండేలా నేతృత్వంలో సౌత్ ఆఫ్రికా ప్రజలు సామాజిక న్యాయం కోసం అనేక సంవత్సరాలు పోరాడారు. కిష్టయ్య ఆత్మ బలిదానం కూడా తెలంగాణ ప్రాంతంలో సామాజిక న్యాయానికి, ప్రజల గౌరవానికి పునాది వేసింది.పోలీసు అధికారిగా ప్రభుత్వానికి సేవ చేయడమే కాకుండా, ప్రజల పక్షాన నిలబడడం కిష్టయ్య చేసిన అత్యంత ధైర్యవంతమైన నిర్ణయం. ఈ త్యాగం, ప్రజాస్వామ్యంలో వ్యక్తిగత బాధ్యతలు ఎంత ముఖ్యమో నిరూపిస్తుంది. ప్రజలు తమ హక్కుల కోసం పోరాడే సమయంలో, ప్రజలకే సేవ చేయవలసిన ప్రభుత్వ వ్యవస్థలోని ఓ భాగంగా ఆయన తన హృదయాన్ని ప్రజలకు అంకితం చేశాడు.

తెలంగాణ రాష్ట్రం: కిష్టయ్య త్యాగానికి నివాళి

2014లో తెలంగాణ రాష్ట్రం ఏర్పాటు జరగడం కిష్టయ్య వంటి అమరుల త్యాగాల పర్యవసానమే. కిష్టయ్య త్యాగం, ప్రపంచ ప్రజాస్వామ్య పోరాటాల చరిత్రలో ఒక అద్భుతమైన ఉదాహరణ.ప్రజల హక్కుల కోసం తన ప్రాణాన్ని అర్పించిన కిష్టయ్య, ప్రజాస్వామ్యానికి ఎనలేని బలాన్ని చేర్చిన ఓ అజరామరమైన యోధుడు. ఆయన త్యాగం తెలంగాణ చరిత్రలో శాశ్వతంగా నిలిచి, ప్రపంచ ప్రజాస్వామ్య పోరాటాలకు అజరామరమైన స్పూర్తిగా ఉంటుంది.ఆయన జీవిత చరిత్రను పాఠ్య పుస్తకాలలో ముద్రించాలి అని తెలంగాణ ప్రభుత్వాన్ని మెపా ( ముదిరాజ్ ఎంప్లాయీస్ అండ్ ప్రొఫెషనల్స్ అసోసియేషన్ తెలంగాణ రాష్ట్రం) అద్యక్షుడు పులి దేవేందర్ ముదిరాజ్ రాష్ట్ర కమిటీ డిమాండ్ చేస్తుంది .