గాయపడిన టీచర్లలో ఒకరి మృతి

విషాదం మిగిల్చిన రోడ్డు ప్రమాదం..
స్పాట్ వాయిస్, హన్మకొండ: ఓఆర్ఆర్‌పై జరిగిన రోడ్డు ప్రమాదం తీవ్ర విషాదాన్ని నింపింది. గాయాలపాలైన ఐదుగురు టీచర్లలో ఒకరు చికిత్స పొందుతూ మృతి చెందారు. వివరాల్లోకి వెళ్తే.. హన్మకొండ గోపాలపురం, డబ్బాల ప్రాంతానికి చెందిన చాప బాబు దొర, మానుపటి రమేష్ బాబు చాప లక్ష్మి, నాలి జయమ్మ, బిజీలి విజయ ములుగు జిల్లా పస్రా మండలంలో టీచర్లుగా పని చేస్తున్నారు. వీరు బుధవారం ఉదయం కారులో విధులకు వెళుతుండగా ఔటర్ రింగ్ రోడ్డపై ఉన్న ముచ్చర్ల నాగారం క్రాస్ రోడ్డుపై బొలెరో వాహనం ఢీ కొంది. ఈ ప్రమాదంలో ఐదుగురు టీచర్లకు గాయాలయ్యాయి. కారులో ప్రయాణిస్తున్న నాలి జయమ్మ అనే మహిళకు తీవ్ర గాయాలు కావడంతో ఆమెను గార్డియన్ ఆస్పత్రిలో చేర్పించారు. అక్కడ ఆమె చికిత్స పొందుతూ బుధవారం మధ్యాహ్నం ఒంటి గంటకు మృతి చెందింది. మృతురాలు పస్రాలోని జెడ్పీఎస్ఎస్ పాఠశాలలో ఉపాధ్యాయురాలిగా పని చేస్తోంది. ఆమెకి ఇద్దరు కుమారులు ఉన్నారు. మృతురాలి తోటి ఉపాధ్యాయుడు చాప బాబు ఫిర్యాదు మేరకు కేయూసీ పోలీసులు కేసు దర్యాప్తు చేస్తున్నారు.