మిషన్ భగీరథ దేశంలోనే ఓ గొప్ప ప్రాజెక్ట్..

మిషన్ భగీరథ దేశంలోనే ఓ గొప్ప ప్రాజెక్ట్..
ఎమ్మెల్యే చల్లా ధర్మారెడ్డి
దామెర మండలం సింగరాజుపల్లి గ్రామ శివారులోని వాటర్ గ్రిడ్ లో మంచినీళ్ల పండుగ
హాజరైన ఆర్ డీసీచైర్మన్ మెట్టు శ్రీనివాస్..
స్పాట్ వాయిస్, దామెర : మిషన్ భగీరథ పథకం దేశంలోనే ఓ గొప్ప ప్రాజెక్ట్ అని, మహిళల నీటి కష్టాలు తీర్చిన అపర భగీరథుడు ముఖ్యమంత్రి కేసీఆర్ అన్నారు. తెలంగాణ రాష్ట్ర అవతరణ దశాబ్ది ఉత్సవాల్లో భాగంగా దామెర మండలం సింగరాజుపల్లి గ్రామ శివారులోని వాటర్ గ్రిడ్ లో మంచి నీళ్ల పండుగ దినోత్సవం కార్యక్రమంలో పరకాల ఎమ్మెల్యే చల్లా ధర్మారెడ్డి, రోడ్ డెవలప్ మెంట్ కార్పొరేషన్ సంస్థ మెట్టు శ్రీనివాస్ తో కలిసి హాజరయ్యారు. ఈ సందర్భంగా చల్లా మాట్లాడుతూ సమైక్య రాష్ట్రంలో తాగునీటి సమస్యతో దశాబ్దాల పాటు ఇబ్బందులు పడ్డ ప్రజలకు.. స్వరాష్ట్రంలో ‘మిషన్‌ భగీరథ’తో సీఎం కేసీఆర్‌ శాశ్వత పరిష్కారం చూపించారన్నారు. పల్లెలు, పట్టణాలు అనే తేడా లేకుండా ప్రతి ఇంటికీ స్వచ్ఛమైన తాగునీటిని అందిస్తున్నమన్నారు. మిషన్ భగీరథ పథకంలో పరకాల నియోజకవర్గంలో మొత్తం 164 ఆవావాసాలకు, పరకాల మున్సిపాలిటీకి మిషన్ భగీరథ నీటిని అందజేస్తున్నామన్నారు. గతంలో నీటి కోసం బిందెలతో రోడ్లపై క్యూలు కట్టిన రోజులు చూశామని, మహిళల నీటి కష్టాలు చూసిన సీఎం కేసీఆర్‌ ఆడబిడ్డల ఆత్మగౌరవం కోసం ప్రతీ ఇంటికి తాగునీళ్లు అందిస్తున్నారన్నారు. కార్యక్రమంలో జెడ్పీటీసీలు, ఎంపీపీలు, ఎంపీటీసీలు, సర్పంచులు, మున్సిపల్ ప్రజా ప్రతినిధులు, మండలాల ప్రజా ప్రతినిధులు మిషన్ భగీరథ అధికారులు, సిబ్బంది తదితరులు పాల్గొన్నారు.