మందుబాబులు హ్యాట్సప్..

నమ్మకాన్ని నిలబెట్టారు..
అంచనాల మేరకు తాగేశారు..
సర్కార్ ఆమ్దాని ఇచ్చేశారు..

స్పాట్ వాయిస్, బ్యూరో: న్యూ ఇయర్‌కు మందు బాబులు సర్కార్ నమ్మకాన్ని నిలబెట్టారు. ఆశించిన మేర ఆమ్దాని ఇచ్చేశారు. మందుబాబులు మద్యాన్ని మంచినీళ్లలా తాగేశారు. రికార్డు స్థాయిలో మద్యం విక్రయాలు జరగడంతో సర్కార్‌కు కాసుల వర్షం కురిసింది. చరిత్రలోనే రికార్డు స్థాయిలో మద్యం విక్రయాలు జరిగినట్లు ఎక్సైజ్‌శాఖ వర్గాలు వెల్లడించాయి. ఒక్క మంగళవారం రోజునే సుమారు రూ.403 కోట్ల మద్యం విక్రయాలు జరిగినట్లు తెలిపారు. డిసెంబర్‌ 28 నుంచి జనవరి 1 ( కేవలం 5 రోజుల్లో) వరకు దాదాపు రూ.1,800 కోట్ల విలువైన మద్యాన్ని మందుబాబులు తాగేసినట్లు ఎక్సైజ్‌శాఖ వర్గాలు తెలిపాయి. గతంతో పోల్చితే ఈసారి మద్యం అమ్మకాలు భారీగా పెరిగినట్లు మద్యం షాపుల యాజమన్యాలు సైతం చెబుతున్నాయి.
సాధారణంగా రూ.100 కోట్లే
రాష్ట్రంలో సాధారణంగా రోజు రూ.100 కోట్ల నుంచి రూ.150 కోట్ల మద్యం అమ్మకాలు జరుగుతుంటాయి. వీకెండ్స్‌లో ఈ లెక్కన రూ.200 కోట్ల నుంచి రూ.300 కోట్ల వరకూ ఉంటుంది. డిసెంబర్ నెల చివరి వారంలో మాత్రం మద్యం అమ్మకాలు డబుల్ అయ్యాయి. 2024 డిసెంబర్ 31న ఒక్క రోజే రాష్ట్ర వ్యాప్తంగా రూ.402 కోట్ల మద్యం అమ్మకాలు జరిగాయని ఎక్సైజ్ అధికారులు వెల్లడించారు. తెలంగాణ వ్యాప్తంగా 2,620 మద్యం షాపులు, 1,117 బార్ అండ్ రెస్టారెంట్లు, పబ్స్ ఉండగా.. ఆయా దుకాణాలకు 19 డిపోల నుంచి బేవరెజ్ సంస్థ మద్యం సరఫరా చేస్తోంది.
కాసుల వర్షమే..
డిసెంబర్ నెలలో మద్యం ద్వారా సర్కారుకు కాసుల వర్షం కురవగా.. రికార్డు స్థాయిలో లిక్కర్ సేల్స్ జరిగినట్లు ఎక్సైజ్ అధికారులు చెబుతున్నారు. ఈ ఒక్క నెలలోనే 3,82,265 కేసుల లిక్కర్, 3,96,114 కేసుల బీర్ల అమ్మకాలు జరిగినట్లు తెలిపారు. 2022 డిసెంబర్‌లో రూ.3,100 కోట్ల లిక్కర్ సేల్స్ జరగ్గా.. 2023లో 4,292 కోట్ల విక్రయాలు జరిగాయి. 2024 డిసెంబర్ 30 వరకు రూ.3,662 కోట్ల మద్యం అమ్మకాలు జరిగాయని అధికారులు తెలిపారు. డిసెంబర్ 31ని కలుపుకుంటే దాదాపు 4 వేల కోట్ల మద్య విక్రయాలు జరిగాయి. కాగా, గతేడాది కంటే కాస్త తక్కువగా మద్యం విక్రయాలు జరిగినట్లు ఎక్సైజ్ అధికారులు తెలిపారు.