కేటీపీపీలో ఘనంగా బాబూ జగ్జీవన్ రామ్ జయంతి వేడుకలు
స్పాట్ వాయిస్, గణపురం: సమాజంలో అన్ని వర్గాలు అభివృద్ధి నోచుకోవాలన్న బాబు జగ్జీవన్ రామ్ ఆశయాలను సాధించిన రోజే ఆయనకు నిజమైన నివాళని సీఈ సిద్ధయ్య పేర్కొన్నారు. జగ్జీవన్ రామ్115వ జయంతిని పురస్కరించుకొని మంగళవారం కాకతీయ థర్మల్ విద్యుత్ కేంద్రం (కేటీపీపీ) లోని పరిపాలన భవనంలో వేడుకలను ఘనంగా నిర్వహించారు. ముందుగా జగ్జీవన్ రామ్ చిత్రపటానికి సీఈ పూలమాలలు వేసి నివాలులర్పించారు. అనంతరం ఏర్పాటు చేసిన సమావేశంలో ఆయన మాట్లాడుతూ.. ప్రతిఒక్కరూ జగ్జీవన్ రామ్ జీవితాన్ని స్ఫూర్తి గా తీసుకొని ముందుకుసాగాలన్నారు. నిమ్న కులంలో జన్మించిన జగ్జీవన్ రామ్ ఆర్థిక, కుల వివక్షలను అధిగమించి కష్టపడి చదువుకున్నారని గుర్తుచేశారు. సంఘ సంస్కర్తగా, రాజకీయ వేత్తగా ఎదిగి భారత ఉప ప్రధాని పదవిని అలంకరించారని తెలిపారు. క్రమశిక్షణ, పట్టుదల నిజాయితీతో మంత్రి పదవులకు వన్నె తెచ్చారని కొనియాడారు. ఈ కార్యక్రమంలో అన్ని విభాగాల సూపరింటెండెంట్ ఇంజనీర్లు, డివిజనల్, ఎగ్జిక్యూటివ్ ఇంజనీర్లు, ఏడీఈలు, ఏఈలు, ఇంజనీర్స్ అసోసియేషన్ నాయకులు, కార్మిక సంఘ నాయకులు తదితరులు పాల్గొన్నారు.
Recent Comments