లాకప్ లో కోడి పుంజు..

ఏం నేరం చేసిందో పాపం..
స్పాట్ వాయిస్, డెస్క్: లాకప్ లో కోడి పుంజును వేశారు. ఈ ఘటన మహబూబ్‌నగర్‌ జిల్లా జడ్చర్ల పోలీస్‌ స్టేషన్‌లో వెలుగుచూసింది. జడ్చర్ల మండలం బూరెడ్డిపల్లి శివారులో నాటు కోళ్ల దొంగతనాలు జరుగుతున్నాయి. ఈ క్రమంలో రెండు రోజుల కిందట కరివెన గ్రామానికి చెందిన ఓ వ్యక్తి బూరెడ్డిపల్లి గ్రామ శివారులో కోడిపుంజు దొంగతనం చేస్తుండగా స్థానికులు పట్టుకున్నారు. అతడిని పోలీసులకు అప్పగించగా.. వారు నిందితుడితోపాటు కోడిపుంజును సైతం స్టేషన్‌కు తరలించారు. ఆ తర్వాత నిందితుడిని లాకప్‌లో వేసి పోలీసులు విచారణ చేపట్టారు. కోడిపుంజును బయట ఉంచితే కుక్కలు తినే ప్రమాదం ఉందని పోలీసులు నిందితుడితోపాటు కోడిపుంజునూ లాకప్‌లో ఉంచారు. దానికి గింజలు వేస్తూ పోలీసులు కాపలా కాయటం అందరినీ ఆశ్చర్యానికి గురిచేసింది. స్టేషన్‌కు వచ్చిన వారందరూ లాకప్‌లో కోడిపుంజు ఉందనే విషయాన్ని బయట ప్రచారం చేస్తున్నారు. అదికాస్తా సోషల్ మీడియాలో చేరడంతో.. ‘లాకప్ లో కోడి పుంజు’ న్యూస్ ఎల్లలు దాటింది.