కేసీఆర్ తాంత్రిక పూజలు చేస్తుండు..

బొట్టు పెట్టినా.. నిమ్మకాయ ఇచ్చినా తీసుకోవద్దు..
ఇతరుల నాశనం కోరుకునే వ్యక్తిత్వం ఆయనది..
ప్రకటించిన అభ్యర్థుల్లో సగంమందికి టికెట్లు కష్టమే..
బీజేపీ జాతీయ ప్రధాన కార్యదర్శి బండి సంజయ్
స్పాట్ వాయిస్, బ్యూరో: సీఎం కేసీఆర్ పై బీజేపీ జాతీయ ప్రధాన కార్యదర్శి బండి సంజయ్ తీవ్ర విమర్శలు చేశారు. కేసీఆర్ చేసేవన్నీ తాంత్రిక పూజలేనని ఆరోపించారు. ఇలాంటి పూజల్లో కేసీఆర్ ఆరితేరారారని అన్నారు. పండిత్ దీన్ దయాల్ ఉపాధ్యాయ జయంతి సందర్భంగా కరీంనగర్ లో మొక్కలు నాటిన బండి.. మీడియాతో మాట్లాడారు. ఇతర పార్టీల్లోని నేతలు, తమ పార్టీల్లో చెబితే వినని నేతలను నాశనం చేసేందుకు పవర్ ఫుల్ తాంత్రికులను తెచ్చి కేసీఆర్ పూజలు చేయించారని సంజయ్ ఆరోపించారు. కేసీఆర్ నిమ్మకాయ ఇచ్చినా, బొట్టు పెట్టినా, కంకణం కట్టినా కట్టుకోవద్దని ఆ పార్టీ నేతలకు సూచిస్తున్నానని తెలిపారు. సీఎం వ్యక్తిత్వమే అలాంటిదని, ఇతరుల నాశనాలు కోరుకుంటాడన్నారు. డబ్బులతో రాజకీయం చేస్తున్నారని మండిపడ్డారు. కాంగ్రెస్‌లో కేసీఆర్‌ కోవర్టులు ఉన్నారన్నారు. కాంగ్రెస్‌లో కులాల కొట్లాటను కేసీఆరే పెట్టిస్తున్నారని ఆరోపించారు. అక్కడ ఎవరు గెలిచినా కేసీఆర్ దగ్గరికే వెళ్తారని అన్నారు. కేసీఆర్‌ను యువత క్షమించదని ఎంపీ బండి సంజయ్ విమర్శలు గుప్పించారు. కాంగ్రెస్, బీఆర్ఎస్ ఈసారి గెలిచేది లేదన్నారు. ఆ పార్టీ వాళ్లకు విధివిధానాలే లేవన్నారు. కాంగ్రెస్ ఎప్పుడుంటుదో.. ఎప్పుడు బాంబులా పేలిపోతుందో తెలియదన్నారు. కాంగ్రెస్ లో గెలిచినా డబ్బులకు అమ్ముడు పోతారని కేసీఆర్ కు తెలుసన్నారు. కాంగ్రెస్ పార్టీ కేసీఆర్ కు ఏటీఎం లాంటిదని విమర్శించారు. కాంగ్రెస్ లో కులాల కొట్లాట, బీఆర్ఎస్ డబ్బుల కొట్లాట ఉందన్నారు.
సగం మందికి టికెట్ డౌటే..
కేసీఆర్ ప్రకటించిన అభ్యర్థుల్లో సగం మందికి టికెట్ ఇవ్వడని బండి సంజయ్ ఆరోపించారు. ఒకవేళ ఇచ్చినా వారిని ఓడించి.. కాంగ్రెస్ పార్టీలో గెలిచిన వారిని తీసుకుంటాడన్నారు. ప్రజలు ఎప్పుడెప్పుడు ఎన్నికలొస్తాయా.. కేసీఆర్ ను ఓడిద్దామా అనే కసితో ఉన్నారని అన్నారు. కరీంనగర్ లో చిల్లర రాజకీయాలు నడుస్తున్నాయని.. పార్టీలో చేరిన వారికి 5 లక్షలు, పది లక్షలు ఇస్తున్నారని ఆరోపించారు. బీసీబంధు, దళితబంధు పేరిట యువకులను పార్టీలోకి ఆకర్షించే ప్రయత్నం చేస్తున్నారన్నారు.