‘కార్తీక దీపం’ చూడనివ్వడం లేదని చేయి కొరికేశాడు..

సీరియల్ మూడ్ లో రక్తం కళ్లజూశాడు..
‘కార్తీక దీపం’ చూడనివ్వడం లేదని చేయి కొరికేశాడు..
ములుగు జిల్లాలో అవాక్కయ్యే ఘటన
పోలీస్ స్టేషన్ కు చేరిన ఇష్యూ
స్పాట్ వాయిస్, ములుగు: డాక్టర్‌ బాబు, దీపలను ఇక చూడలేనన్న బాధతో కార్తీకదీపం సీరియల్‌ ఆఖరి ఎపిసోడ్‌ చూస్తుండగా అరువు కోసం విసిగించిన ఓ వ్యక్తి చేతిని కొరికాడు. ఈ ఘటన ములుగు జిల్లా వెంకటాపూర్‌ పరిధిలో చోటు చేసుకోగా.. ఆలస్యంగా వెలుగు చూసింది. పాలంపేటకు చెందిన గట్టు మొగిలి కిరాణా దుకాణం నిర్వహిస్తుంటాడు. అలాగే బెల్ట్ షాపు సైతం నిర్వహిస్తున్నాడు. అదే గ్రామానికి చెందిన తాళ్లపెల్లి వెంకటయ్య జనవరి 23న రాత్రి మొగిలి దుకాణానికి వచ్చి మద్యం కొనుగోలు చేసి తాగాడు. అనంతరం ఉద్దెరకు మళ్లీ మద్యం కావాలని అడిగాడు. ఈ తరుణంలో కార్తీకదీపం సీరియల్‌ క్లైమాక్స్ ఎపిసోడ్ చూస్తున్న మొగిలి సహనం కోల్పోయి వెంకటయ్యపై దాడి చేసి అతని కుడి చేతి చూపుడు వేలిని కొరికేశాడు. ఈ ఘటనపై వెంకటయ్య తర్వాతి రోజు పోలీసులకు ఫిర్యాదు చేశాడు. దీంతో విచారణ చేసిన పోలీసులు.. కార్తీక దీపం చూస్తుంటే విసిగించడంతోనే దాడి చేశానని మొగిలి చెప్పిన సమాధానంతో అవాక్కయ్యారు. మొగిలిపై కేసు నమోదు చేశారు.