గుడ్ న్యూస్… వారం రోజుల్లో పోలీసుల ఉద్యోగాలకు నోటిఫికేషన్

స్పాట్ వాయిస్, సంగారెడ్డి: పోలీస్‌ ఉద్యోగాల భార్తీకి వారం రోజుల్లో నోటిఫికేషన్‌ రాబోతున్నదని, అభ్యర్థులు సిద్ధంగా ఉండాలని మంత్రి హరీశ్‌ రావు పిలుపునిచ్చారు. ప్రభుత్వం భర్తీ చేస్తున్న 80 వేలకుపైగా ఉద్యోగాల్లో 20 వేల ఖాళీలు పోలీస్‌ శాఖలోనే ఉన్నాయని మంత్రి పేర్కొన్నారు. పటాన్‌చెరులో సంగారెడ్డి జిల్లా పోలీస్ శాఖ ఆధ్వర్యంలో ఏర్పాటు చేసిన ఎస్సై, కానిస్టేబుల్ శిక్షణ తరగతులను మంత్రి హరీశ్‌ రావు ప్రారంభించారు. అనంతరం మాట్లాడుతూ.. సమయాన్ని వృథా చేయకుండా చదువుకొని అందివచ్చిన అవకాశాన్ని సద్వినియోగం చేసుకోవాలన్నారు. పోలీస్ ఉద్యోగాల్లో 30 శాతం రిజర్వేషన్ కల్పించిన ఏకైక ప్రభుత్వం టీఆర్‌ఎస్‌ సర్కార్‌ మాత్రమేనని చెప్పారు. 95 శాతం ఉద్యోగాలు స్థానికులకే దక్కేలా రిజర్వేషన్లు కల్పిస్తున్నామని తెలిపారు. మేము అన్నీ భర్తీ చేసుకుంటూ వెళ్తున్నాము.. మరి కేంద్ర ప్రభుత్వం 15 లక్షల ఉద్యోగాల భర్తీ ఎప్పుడు చేస్తుందో బండి సంజయ్ చెప్పాలన్నారు. ధరలు పెంచినందుకు, ఉద్యోగాలు ఇవ్వనందుకు, ప్రజల జీవితాలను ఆగం చేస్తున్నందుకు యాత్ర చేస్తున్నారా..? ఏం ముఖం పెట్టుకొని తిరుగుతున్నారు అని ఆయన ప్రశ్నించారు. తెలంగాణ విద్యార్థులు ఉద్యోగాల భర్తీ గురించి ఎక్కడికక్కడ బీజీపీని నిలదీయాలని, ట్విట్టర్ వేదికగా మోడీ, బండి సంజయ్, కిషన్ రెడ్డిలను ప్రశ్నించండి అని కోరారు. చాలా మంది అభ్యర్థుల కోరిక మేరకు సీఎం కేసీఆర్ మూడేళ్ల వేయోపరిమితి రిలాక్సేషన్ ఇచ్చారని మంత్రి హరీష్ రావు తెలిపారు.