ట్రాక్టర్ రోటావేటర్ లో పడి బాలుడి మృతి..

ట్రాక్టర్ నడుపుతున్న తండ్రి..
వరంగల్ జిల్లాలో విషాదం..
స్పాట్ వాయిస్, నల్లబెల్లి: వరంగల్ జిల్లా నల్లబెల్లి మండలంలోని గోవిందాపురంలో ట్రాక్టర్ రోటావేటర్​లో పడి ఓ బాలుడు మృతి చెందాడు. ఈ విషాద ఘటన వివరాలు ఇలా ఉన్నాయి. నల్లబెల్లి మండలం గోవిందాపురం శివారు లైన్ తండాకు చెందిన గుగులోతు ఏసు, రాజు దంపతుల కుమారుడు బాలు తల్లిదండ్రులతో కలిసి సోమవారం పొలం వద్దకు వెళ్లాడు. బాలు తండ్రి పత్తి విత్తనాలు నాటేందుకు రోటావేటర్​తో పొలం చదును చేస్తున్నాడు. తండ్రి రాజుకు మంచినీళ్లు అందించిన బాలుడు ట్రాక్టర్​పైన కూర్చున్నాడు. మంచి నీరు తాగిన తండ్రి మళ్లీ ట్రాక్టర్​నడుపుతుండగా బాలుడు ప్రమాదవశాత్తు రోటావేటర్​లో పడిపోయాడు. గమనించిన రాజు ట్రాక్టర్ ఆపి చూసే సరికి బాలుడు రోటావేటర్​లో పడి నుజ్జు నుజ్జు అయ్యాడు. ఇంకో రెండు రోజులు అయితే పాఠశాలకు వెళ్లే తన కుమారుడు కళ్ల ముందే తిరిగిరాని లోకాలకు వెళ్లాడని కన్నీటి పర్యాంతమయ్యాడు.