భూపాలపల్లిలో విషాదం… మిర్చి రైతు ఆత్మహత్య

మిర్చి రైతు ఆత్మహత్య
స్పాట్ వాయిస్, గణపురం: మిర్చి పంట దెబ్బతిన్నదనే ఆవేదనతో  యువ రైతు ఆత్మహత్యకు పాల్పడ్డాడు. ఎస్సై ఉదయ్ కిరణ్ తెలిపిన వివరాల ప్రకారం.. జయశంకర్ భూపాలపల్లి జిల్లా గణపురం మండలం గాంధీనగర్ గ్రామానికి చెందిన బీణబోయిన సురేష్ (39) తనకున్న ఒకటిన్నర ఎకరాల్లో మిర్చి పంట సాగు చేశాడు. పెట్టుబడి కోసం అప్పు చేశాడు. మిర్చి పంటకు తామర పురుగు ఆశించడంతో పంట పూర్తిగా దెబ్బతింది. దీంతో అప్పులు ఎలా తీర్చాలనే మనస్తాపంతో సురేష్ శుక్రవారం తెల్లవారుజామున ఎవరూ లేని సమయంలో ఇంటి వెనకాల జామ చెట్టుకు ఉరివేసుకుని బలవన్మరణానికి పాల్పడ్డాడు. మృతుడి తండ్రి భిక్షపతి ఫిర్యాదు మేరకు కేసు నమోదు చేసుకొని పోలీసులు దర్యాప్తు చేస్తున్నారు. మృతుడికి భార్య ఇద్దరు కుమారులు ఉన్నారు