ప్రశాంతంగా కానిస్టేబుల్‌ ప్రిలిమినరీ రాత పరీక్ష

ప్రశాంతంగా కానిస్టేబుల్‌ ప్రిలిమినరీ రాత పరీక్ష
– మండల కేంద్రంలో పరీక్ష కేంద్రాలను తనిఖీ చేసిన  భూపాలపల్లి ఎస్పీ జె.సురేందర్‌రెడ్డి
స్పాట్ వాయిస్, గణపురం: తెలంగాణ రాష్ట్ర పోలీస్‌ రిక్రూట్‌మెంట్‌ బోర్డ్‌ నిర్వహిస్తున్న ప్రిలిమినరీ రాత పరీక్షకు ప్రశాంతంగా జరిగినట్లు ఎస్పీ జె.సురేందర్‌రెడ్డి తెలిపారు. ఆదివారం మండల కేంద్రంలోని పరీక్ష కేంద్రాలను ఆయన పరిశీలించారు. పరీక్షల నిర్వహణ , వసతులు తదితర అంశాలకు సంబంధించిన వివరాలను స్థానిక పోలీస్ అధికారులను అడిగి తెలుసుకున్నారు. ఈ సందర్భంగా ఎస్పీ మాట్లాడుతూ.. కానిస్టేబుల్‌ ప్రిలిమినరీ రాత పరీక్షకు పకడ్బందీగా ఏర్పాట్లు చేసినట్లు తెలిపారు. పరీక్షల నిర్వహణ పూర్తిగా పారదర్శకంగా ఉంటుందని తెలిపారు. అదేవిధంగా పరీక్షా కేంద్రం వద్ద ఎలాంటి ఇబ్బందికర సంఘటనలు జరగకుండా బందోబస్తు ఏర్పాటు చేశామని తెలిపారు. జిల్లాలో పరిధిలో 17 పరీక్ష కేంద్రాలు ఏర్పాటు చేశామని, 4,755 మంది పరీక్ష రాస్తున్నట్లు పేర్కొన్నారు. మండల కేంద్రంలో మోడల్ స్కూల్, జిల్లా పరిషత్ ఉన్నత పాఠశాల, చెల్పూర్ లోని జిల్లా పరిషత్ ఉన్నత పాఠశాలలో పరీక్షా కేంద్రాలను ఏర్పాటు చేసినట్లు పేర్కొన్నారు. కాగా ఎలాంటి అవాంఛనీయ సంఘటనలు జరగకుండా చిట్యాల సీఐ పులి వెంకట ఆధ్వర్యంలో ఎస్సై అభినవ్, పోలీస్ సిబ్బంది పటిష్ట బందోబస్తు ఏర్పాటు చేశారు.