మళ్లీ వర్గపోరేనా..?

పోటాపోటీగా గండ్ర- చారీల ఫ్లెక్సీల ఏర్పాటు
భూపాలపల్లిలో రేపు మంత్రి కేటీఆర్ పర్యటన
ఏం జరుగుతుందోననే టెన్షన్ లో ఎమ్మెల్యే గండ్ర..!

స్పాట్ వాయిస్, భూపాలపల్లి ప్రతినిధి : భూపాలపల్లిలో మంత్రుల పర్యటన మళ్లీ వర్గపోరుకు ఆజ్యం పోసేలా కనిపిస్తోంది. తెల్లవారితే మంత్రులు నియోజకవర్గంలో పర్యటించనున్నారు. ఈ నేపథ్యంలో గండ్ర, సిరికొండ వర్గీయులు బల ప్రదర్శనకు దిగారు. పోటాపోటీగా ఫ్లెక్సీలు ఏర్పాటు చేస్తున్నారు. ఎవరికి ఎవరు తక్కువ కాదన్నట్లుగా పట్టణంలోని ప్రధాన కూడళ్లను ఫ్లెక్సీలను నింపేస్తున్నారు. గతంలో ఎమ్మెల్సీ కల్వకుంట్ల కవిత పర్యటన సందర్భంగా గండ్ర వర్గీయులు, సిరికొండ వర్గీయులు ఘర్షణకు దిగిన విషయం తెలిసిందే. అప్పటి నుంచి నివురుగప్పిన నిప్పులా ఉన్న రెండు వర్గాలు మంత్రుల రాకతో మరోసారి తమ సత్తా చాటుకునేందుకు ప్రయత్నాలు చేస్తున్నాయి. ఇందులో భాగంగానే ఎమ్మెల్యే గండ్ర ఫ్లెక్సీలకు మించి ఎమ్మెల్సీ సిరికొండ మధుసూదనాచారి ఫ్లెక్సీలు దర్శనమిస్తున్నాయి. వచ్చే ఎన్నికల్లో టికెట్ తనకే వస్తుందని సిరికొండ వర్గీయులు ప్రచారం చేస్తున్నారు. ఈ క్రమంలో పోటాపోటీగా ఫ్లెక్సీలు ఏర్పాటు చేస్తున్నారు. మంత్రి కేటీఆర్ దృష్టిలో చారీ సాబ్ బలంగా ఉన్నట్లు కనిపించేలా ప్రచారం పర్వం మొదలుపెట్టారు. అయితే ఇది గండ్ర వర్గీయులకు కంటగింపుగా మారింది. కేటీఆర్ పర్యటనలో ఇరువర్గాలు మళ్లీ ఏదైనా రచ్చ చేస్తాయోనని నియోజకవర్గ బీఆర్ ఎస్ కార్యకర్తలు చర్చించుకుంటున్నారు.