మంచిరోజులొస్తాయ్.. 

తెలంగాణను పదేళ్లపాటు ఏలిన కారు.. ఇప్పుడు అష్టకష్టాలు పడుతోంది. హస్తం వ్యూహాలతో కారు ఆగమాగం అవుతోంది. ప్రతిపక్ష హోదాను కాపాడుకునేందుకు వ్యూహాలు రచించాల్సిన దుస్థితికి వచ్చేసింది. అసెంబ్లీ ఎన్నికలతో పవర్ పోవడం, ఎంపీ ఎన్నికల్లో ఖాతా తెరవకపోవడంతో.. బీఆర్ఎస్ పీకల్లోతు కష్టాల్లో కూరుకుపోయింది. ఈ క్రమంలోనే.. గులాబీ పార్టీలోని గల్లీ నేతల నుంచి మొదలు కీలక నాయకులంతా ఒక్కొక్కరిగా కాంగ్రెస్ కండువా కప్పుకుంటుండగా.. సిట్టింగ్ ఎమ్మెల్యేలు సైతం హస్తం గూటికి చేరుకుంటున్నారు. దీంతో.. పార్టీ పరిస్థితి మరింత జటిలంగా మారింది. బీఆర్ఎస్ఎల్పీని విలీనం చేసే దిశగా కాంగ్రెస్ పార్టీ వ్యూహాలు రచిస్తోందన్న వార్తలు వైరల్ అవుతున్న నేపథ్యంలో.. పార్టీని కాపాడుకునేందుకు గులాబీ బాస్ కేసీఆరే స్వయంగా రంగంలోకి దిగారు.

 కేసీఆర్‌కు అత్యంత సన్నిహితుడు, సీనియర్ నేత, మాజీ స్పీకర్, బాన్సువాడ ఎమ్మెల్యే పోచారం శ్రీనివాస్ రెడ్డి, జగిత్యాల ఎమ్మెల్యే డాక్టర్ సంజయ్ కుమార్ సైతం కాంగ్రెస్ పార్టీలో చేరి ఊహించని షాక్ ఇచ్చారు. మరో 10 మంది బీఆర్ఎస్ ఎమ్మెల్యేలు కూడా.. కాంగ్రెస్ కండువా కప్పుకునేందుకు సిద్ధంగా ఉన్నారంటూ వార్తలు వస్తున్న నేపథ్యంలో.. గులాబీ పార్టీ అధిష్ఠానం అప్రమత్తమైనట్టు తెలుస్తోంది. ఇందులో భాగంగా తనదైన వ్యూహాలు రచిస్తున్నట్టు సమాచారం. ఈ క్రమంలోనే.. ఎర్రవెల్లిలోని తన ఫాంహౌస్‌లో బీఆర్ఎస్ ఎమ్మెల్యేలతో కేసీఆర్ భేటీ అయ్యారు. రాష్ట్రంలో తాజాగా నెలకొన్న రాజకీయ పరిణామాలతో పాటు పార్టీ ఫిరాయింపులపై చర్చించినట్టు సమాచారం. మాజీ స్పీకర్‌ పోచారం శ్రీనివాస్‌ రెడ్డి పార్టీ మారడాన్ని అస్సలు పట్టించుకోవద్దని.. కొందరు స్వార్థపరులు వెళ్లిపోయినంత మాత్రాన పార్టీకి వచ్చే నష్టమేమీ లేదంటూ చెప్పినట్టు తెలుస్తోంది. వైఎస్ రాజశేఖర్ రెడ్డి హయాంలో ఇలాంటివి ఎన్ని జరిగినా.. భయపడలేదని గుర్తుచేశారు.

భవిష్యత్‌లో బీఆర్‌ఎస్‌కు మళ్లీ మంచి రోజులు వస్తాయని.. ఎవరూ తొందరపడొద్దని ఎమ్మల్యేలకు గులాబీ బాస్ సూచించినట్టు సమాచారం. ఇలాంటి పరిణామాలు ఆనాటి వైఎస్‌ హయాంలోనే జరిగాయని.. అయినా మనం భయపడలేదని కేసీఆర్‌ గుర్తు చేశారు. మాజీ స్పీకర్‌ పోచారం శ్రీనివాస్‌ రెడ్డి పార్టీ మారడాన్ని పెద్దగా పట్టించుకోవాల్సిన అవసరం లేదని సూచించారు. కొందరు ఎమ్మెల్యేలు పార్టీ మారినంత మాత్రాన బీఆర్‌ఎస్‌కు వచ్చే నష్టం ఏమీ లేదని స్పష్టం చేశారు. రేపట్నుంచి వరుసగా ఎమ్మెల్యేలు, ఎమ్మెల్సీలతో భేటీలు ఉంటాయని స్పష్టం చేశారు. ప్రజలకు ఇచ్చిన హామీలను అమలు చేయడంలో రేవంత్ రెడ్డి విఫలమయ్యారని ఆరోపించారు. రాష్ట్రంలో లా అండ్ ఆర్డర్ పూర్తిగా దెబ్బతిన్నదని అన్నారు. భవిష్యత్తులో మనకు‌ మంచి రోజులు వస్తాయని తెలిపారు. ఎమ్మెల్యేలు చేజారిపోకుండా ఉండేందుకు.. నిత్యం టచ్‌లో ఉండి కాపాడుకునే కొత్త వ్యూహాన్ని కేసీఆర్ అమలు చేస్తున్నట్టు సమాచారం. ఇన్ని రోజులూ.. పార్టీ నాయకత్వం తమకు అందుబాటులో ఉండదంటూ తమపై ఉన్న ఆరోపణలు తిప్పికొట్టటంతో పాటు.. ప్రభుత్వ తీరుపై తమ కార్యాచరణను నిత్యం వారితో చర్చించడం ద్వారా ఎమ్మెల్యేలు, ఎమ్మెల్సీలు, రాజ్యసభ సభ్యులను కాపాడుకోవాలని చూస్తున్నట్టు సమాచారం.

కేసీఆర్ ఎమ్మెల్యేలు భేటీ కాగా.. ఐదుగురు ఎమ్మెల్యేలు సమావేశానికి డుమ్మా కొట్టినట్లు సమాచారం. ఇప్పటికే పార్టీ మారుతారనే వార్తలు వస్తుండగా.. వీరు గైర్హాజర్ తో పార్టీ మార్పు కన్ఫాం అంటున్నారు. కేసీఆర్ తో భేటీలో ఎమ్మెల్యేలు హరీష్ రావు, వేముల ప్రశాంత్‌రెడ్డి, కేపీ వివేకానంద గౌడ్‌, మాగంటి గోపీనాథ్‌, ముఠా గోపాల్‌, మాధవరం కృష్ణారావు, అరికెపూడి గాంధీ, ప్రకాశ్‌గౌడ్‌, ఎమ్మెల్సీలు శేరి సుభాశ్‌ రెడ్డి, దండె విఠల్‌, మాజీ ఎమ్మెల్యేలు జోగు రామన్న, నాయకులు క్యామ మల్లేశ్‌, రావుల శ్రీధర్‌ రెడ్డి పాల్గొన్నారు. ఈ సందర్భంగా ఎమ్మెల్యేలతో కలిసి కేసీఆర్‌ మధ్యాహ్నా భోజనం కూడా చేశారు