ఆర్టీసీ బస్సు ఢీకొని తాత, మనవరాలు మృతి
భూపాలపల్లి జిల్లాలో విషాదం
స్పాట్ వాయిస్, రేగొండ:జయశంకర్ భూపాలపల్లి జిల్లాలో రోడ్డు ప్రమాదం జరిగింది. రేగొండ మండలం భాగిర్తిపేట వద్ద బైక్ ను ఆర్టీసీ బస్సు ఢీకొట్టిన ఘటనలో తాత, మనవరాలు అక్కడికక్కడే మృతి చెందారు. వివరాలు ఇలా ఉన్నాయి..గణపురం మండలం సీతారాంపురం గ్రామానికి చెందిన నరాల చిన్న సమ్మయ్య అలియాస్ బక్కయ్య (60) తన మనవరాలు అక్షిత(14)తో కలిసి టీవీఎస్ చాంప్ పై రేగొండ మండలం పోచంపల్లిలో ఉన్న చిన్న కూతురు ఇంటికి వెళ్తున్నారు. ఈ క్రమంలో భాగిర్తిపేట స్టేజ్ వద్ద వెనుక నుంచి అతి వేగంగా వచ్చిన ఆర్టీసీ బస్సు ఢీ కొట్టింది. దీంతో నరాల చిన్న సమ్మయ్య, అక్షిత అక్కడికక్కడే దుర్మరణం చెందారు. కాగా సమ్మయ్యకు ఇద్దరు కూతుర్లు ఉన్నారు. పెద్ద కూతురు ములుగు జిల్లా వెంకటాపురం మండలం నారాయణపురం, చిన్న కూతురు రేగొండ మండలం పోచంపల్లిలో ఉంటున్నారు. చిన్న కూతురు బిడ్డ అక్షిత సమ్మర్ హాలిడేస్ లో అమ్మగారి ఇంటికి వచ్చింది. అయితే సోమవారం ఉదయం తాత, మనుమరాలు పోచంపల్లి కి వెళుతుండగా ఈ దుర్ఘటన జరిగింది. స్థానికుల సమాచారంతో ఘటనాస్థలికి చేరుకున్న రేగొండ పోలీసులు కేసు దర్యాప్తు చేస్తున్నారు.
Recent Comments