పంట పొలంలోనే ప్రాణం విడిచిన రైతు

భూపాలపల్లి జిల్లాలో విషాదం..
విద్యుదాఘాతంతో రైతు మృతి
బస్వరాజ్ పల్లిలో ఘటన
స్పాట్ వాయిస్, గణపురం: విద్యుదాఘాతానికి గురై రైతు మృతిచెందిన విషాద ఘటన జయశంకర్ భూపాలపల్లి జిల్లా గణపురం మండలం బస్వరాజుపల్లి గ్రామంలో ఆదివారం చోటు చేసుకున్నది. పోలీసులు, గ్రామస్తులు తెలిపిన వివరాల ప్రకారం.. బస్వరాజ్ పల్లి గ్రామ పంచాయతీ పరిధిలోని మేరపల్లి గ్రామానికి చెందిన గండు సంపత్ (48) అనే రైతు ఎప్పటిలాగే ఆదివారం ఉదయం తనకు ఉన్నటువంటి వ్యవసాయ పొలానికి నీరు పెట్టేందుకు వెళ్లాడు. పొలంలో ఉన్నటువంటి త్రీఫేస్ ఎల్ టీ లైవ్ విద్యుత్ వైరు తెగిపోయి పొలంలో పడడంతో వైరు తగిలి విద్యుదాఘాతానికి గురై సంపత్ అక్కడికక్కడే మృతి చెందాడు. కాగా ఉదయం వెళ్లిన సంపత్ మధ్యాహ్నం వరకు ఇంటికి రాకపోవడంతో తన కుమారుడు పొలం వద్దకు వెళ్లి చూడగా సంపత్ విగతజీవిగా పడి ఉన్నాడు. మృతుడికి భార్య, ముగ్గురు కుమారులు ఉన్నారు. భార్య సాంబలక్ష్మి ఫిర్యాదు మేరకు పోలీసులు కేసు నమోదు చేసుకుని, మృతదేహాన్ని పోస్టుమార్టం నిమిత్తం ములుగు సివిల్ ఆస్పత్రికి తరలించారు.