కుక్క కరుస్తోంది.. కేసు పెట్టండి..

శునకంపై ఫిర్యాదు చేసిన బాధితుడు
అవాక్కయిన పోలీసులు
స్పాట్ వాయిస్, మహబూబాబాద్: కుక్క తనను పదేపదే కరుస్తోందని, దానిపై చర్యలు తీసుకోవాలని వ్యక్తి పోలీసులకు ఫిర్యాదు చేశాడు. ఈ వింత ఘటన మహబూబాబాద్ జిల్లా గూడూరు మండలం బ్రాహ్మణపల్లిలో చోటుచేసుకుంది. వివరాల్లోకి వెళ్తే… గ్రామానికి చెందిన ధారవత్ పూల్య నాయక్ గూడూరు మండలంలోని వ్యవసాయ శాఖ కార్యాలయం సమీపం నుంచి తన పొలం వద్దకు వెళ్లేవాడు. అక్కడికి సమీపంలో ఉండే ఇంటి యజమాని కుక్కను పెంచుకుంటున్నాడు. అది పూల్యాను చూడగానే అతన్ని కరిచేందుకు మీదకొచ్చేది. గతంలో రెండుసార్లు గాయలపాలుకాగా.. తాజాగా పుల్యాను కుక్క కరిచింది. రోడ్డు మీదకు వచ్చి అందరినీ కరుస్తున్న కుక్కను ఇంట్లో కట్టేయాలని ఇంటి యజమానికి చెప్పిన తీరు మార్చుకోకపోవడంతో విసిగిపోయిన బాధితుడు పోలీసులను ఆశ్రయించాడు. తనను కరుస్తున్న కుక్కతో పాటు దాని యజమానిపై చర్యలు తీసుకోవాలంటూ ఫిర్యాదు చేశాడు. అతడి ఫిర్యాదు చూసిన పోలీసులు తొలుత అవాక్కయ్యారు. ఆ తర్వాత తేరుకుని డాగ్ ఓనర్ను స్టేషన్ కు పిలిపించి మందలించారు. చికిత్సకయ్యే ఖర్చు భరిస్తానని కుక్క యజమానికి హామీ ఇవ్వడంతో ఫిర్యాదును వెనక్కి తీసుకున్నాడు.