ఏపీకి వెళ్లండి..

ముగ్గురు ఐపీఎస్ లకు కేంద్ర హోంశాఖ ఆదేశం
స్పాట్ వాయిస్, బ్యూరో: రాష్ట్రంలో విధులు నిర్వహిస్తున్న ముగ్గురు ఐపీఎస్ అధికారులు శనివారం ఏపీలో రిపోర్ట్​ చేయాలని కేంద్ర హోంశాఖ ఆదేశాలు జారీ చేసింది. రహదారి భద్రత అథారిటీ చైర్మన్​గా ఉన్న అంజనీ కుమార్, తెలంగాణ పోలీసు అకాడమీ డైరెక్టర్ అభిలాష బిస్త్, కరీంనగర్​పోలీసు కమిషనర్ అభిషేక్ మహంతిని ఏపీకి వెళ్లాలని ఆదేశించింది. 2014లో రాష్ట్ర విభజన తర్వాత అఖిల భారత సర్వీసు అధికారులను రెండు రాష్ట్రాలకు డీఓపీటీ కేటాయించింది. ఈ కేటాయింపులను వ్యతిరేకిస్తూ 10 మంది ఐఏఎస్​లు, ముగ్గురు ఐపీఎస్​లు అప్పట్లో క్యాట్​ను ఆశ్రయించారు. ఈ అంశంపై డీవోపీటీ తెలంగాణ హైకోర్టులో పిటీషన్‌ వేసింది. విభజన సమయంలో నియమించిన ప్రత్యూష్‌ సిన్హా కమిటీ సిఫార్సులను పరిగణనలోకి తీసుకుని వీరి అభ్యర్థనలను పరిశీలించాలని గతేడాది జనవరిలో హైకోర్టు తీర్పు వెలువరించింది. 2024 మార్చిలో ఖండేకర్‌ కమిటీని నియమించించారు. ఈ కమిటీ సిఫార్సుల మేరకు గత అక్టోబరులో కొందరు ఐఏఎస్​లను ఏపీకి పంపించారు. ఇప్పుడు మరో ముగ్గురు ఐపీఎస్​లను ఏపీలో రిపోర్ట్‌ చేయాలని హోంశాఖ ఆదేశించింది.