రేవ్ పార్టీలో హేమ..

స్పాట్ వాయిస్, డెస్క్: బెంగళూరులోని నగర శివారు ప్రాంతంలోని ఓ ఫామ్​హౌస్​లో నిర్వహించిన రేవ్ పార్టీ సహాయ నటి హేమ ఉన్నట్లు బెంగళూరు నగర్ పోలీస్ కమిషనర్ బి. దయానంద్ తెలిపారు. మంగళవారం ఆయన మీడియాతో మాట్లాడుతూ.. ఈ కేసులో ఐదుగురిని అరెస్టు చేసినట్లు తెలిపారు. ప్రజాప్రతినిధుల ప్రమేయం మాత్రం లేదని ఈ సందర్భంగా కమిషనర్ స్పష్టం చేశారు. సీసీబీ పోలీసులు, స్థానిక పోలీసులు నగర శివారు ప్రాంతంలో పార్టీ జరుగుతుందని తెలిసి దాడులు నిర్వహించారని తెలిపారు. మాదక ద్రవ్యాలను గుర్తించేందుకు శిక్షణ పొందిన డాగ్ స్వ్కాడ్​ సహాయం తీసుకున్నట్లు వివరించారు. ఈ పార్టీలో వంద మందికి పైగా పాల్గొన్నారు. ఈ దాడిలో మత్తు పదార్థాలను గుర్తించామన్నారు. కొందరు తాము వాడుతున్న డ్రగ్స్​ను స్విమ్మింగ్ పూల్​తో పాటు ఇతర ప్రాంతాల్లో విసిరేశారని వెల్లడించారు. ఘటనకు సంబంధించి ఎలక్ట్రానిక్ సిటీ పోలీస్ స్టేషన్​లో కేసు నమోదు చేశామన్నారు. రేవ్ పార్టీలో తాను లేనని సహాయ నటి హేమ సోమవారం ఒక వీడియోను విడుదల చేశారు. అయితే ఆ వీడియో ఎక్కడి నుంచి ఆమె తీశారో తెలియడం లేదని బెంగళూరు నగర పోలీసు కమిషనర్ దయానంద్ అన్నారు. ఈ విషయంపై కూడా దర్యాప్తు జరుగుతోందని చెప్పారు.