లక్షలాది మందిని కదిలించిన సాయి చందు గొంతు
కొవ్వొత్తుల ర్యాలీలో పెద్దపల్లి జెడ్పీ చైర్మన్‌ పుట్ట మధూకర్‌
స్పాట్ వాయిస్, మంథని: అణగారిన వర్గాల గురించి పాట రూపంలో గళమెత్తిన గొప్ప గాయకుడు, తెలంగాణ ఉద్యమంలో కీలక పాత్ర పోషించిన గొప్ప ఉద్యమకారుడిని తెలంగాణ కోల్పోయిందని బీఆర్‌ఎస్‌ పార్టీ మంథని నియోజకవర్గ ఇంచార్జీ, పెద్దపల్లి జిల్లా పరిషత్‌ చైర్మన్‌ పుట్ట మధూకర్‌ అన్నారు. రాష్ట్ర గిడ్డంగుల సంస్థ చైర్మన్‌, ప్రముఖగాయకుడు, ఉద్యమకారుడు సాయి చందు మృతికి సంతాపంగా పట్టణంలోని రాజగృహ నుంచి అంబేద్కర్‌ చౌక్‌ వరకు ప్రదర్శనగా వచ్చి చౌరస్తాలో సాయి చంద్‌ చిత్రపటానికి పూలమాల వేసి నివాళులుఅర్పించి కొవ్వొత్తులతో సంతాపం తెలిపారు. ఈసందర్భంగా ఆయన మాట్లాడుతూ.. తెలంగాణ ఉద్యమ సమయంలో ప్రజల్లో చైతన్యం తీసుకువచ్చేలా సాయిచంద్‌ అనేక పాటలు పాడాడని, ఒక్క ఉద్యమ సమయంలోనే కాకుండా అన్ని వర్గాల ప్రజల్లో చైతన్యం తీసుకురావడం, అంబేద్కర్‌ చరిత్ర, అంటరానితన నిర్మూలనలాంటి అంశాలపై అనేక పాటలు పాడాడని ఆయన గుర్తు చేశారు. లక్షలాది మంది ప్రజలను చైతన్యపర్చిన గొంతు సాయి చందుదేనని ఆయన అభివర్ణించాడు. ముఖ్యమంత్రి కేసీఆర్‌ వెంటే నడుస్తూ తెలంగాణ రాష్ట్ర సాధనలో కీలకపాత్ర పోషించిన గొప్ప ఉద్యమకారుడు సాయి చందు అని చెప్పారు. చిన్న వయస్సులో సాయి చందు మృతి చెందడం బాధాకరమని ఆయన పేర్కొన్నారు.
Recent Comments