ఈటల పయనమెటు..?

ఈటల జమునా ఏం చెప్పనున్నారు..
సర్వత్రా ప్రెస్ మీట్ పైనే చర్చ
12గంటల తర్వాత ఏం జరగనుంది..
స్పాట్ వాయిస్, బ్యూరో: ఈటల జమునా ఏం చెప్పబోతున్నారు.. ఈటల రాజేందర్ పార్టీ వీడుతారనే ఊహాగానాల నేపథ్యంలో ఈటల జమునా ప్రెస్ మీట్ పెట్టడం ఇప్పుడు సర్వత్రా చర్చగా మారింది. ఈటల ఢిల్లీ వెళ్లిరావడం, ఆ వెంటనే జమునా ప్రెస్‌మీట్ పెడుతుండడంతో ఏదో పెద్ద విషయమే ప్రకటించబోతున్నారనే చర్చ సాగుతోంది. ప్రస్తుతం రాజకీయాలు హాట్ హాట్‌గా సాగుతున్న ప్రస్తుత సమయంలో.. ఈటల రాజేందర్ ఏ నిర్ణయం తీసుకోబోతున్నారు? ప్రెస్ మీట్ లో ఏం చెప్పబోతున్నారు? అనే ఉత్కంఠ నెలకొంది. ఈటల ఢిల్లీ నుంచి వచ్చిన వెంటనే భార్యతో బాగా ఆలోచించి, చర్చించి.. ఓ ఫైనల్ నిర్ణయానికి వచ్చారని అంటున్నారు. ఈ డెసిషన్ ఏంటో చెప్పడానికే ప్రెస్‌మీట్ పెడుతున్నారని చెబుతున్నారు. ఈటల స్వతహాగా అత్యంత సమర్థుడైన లీడర్. అయితే, అత్యంత కీలక సమయాల్లో మాత్రమే ఆయన సతీమణి జమున జోక్యం చేసుకుంటారు. గతంలో బీఆర్ఎస్‌ను వీడే సమయంలో ఈటల వెంట నిలిచారు జమున. ఆ సమయంలో ఉమ్మడిగా మీడియా సమావేశం పెట్టి.. కేసీఆర్ తీరును ఎండగట్టారు. అయితే, ఉద్యమ విప్లవ భావాలు మెండుగా ఉండే ఈటల రాజేందర్.. కాషాయ కూటమిలో కొంతకాలంగా ఇమడలేకపోతున్నారని వార్తలు వస్తున్నాయి. మంగళవారం జమునా ప్రెస్‌మీట్ అనగానే.. సతీసమేతంగా మీడియా ముందుకు వస్తున్నారంటే.. ఏంటి సంగతి..? ఈటల రాజేందర్ బీజేపీని వీడుతున్నారా? ఆ నిర్ణయం ప్రకటించడానికే ప్రెస్‌మీట్ పెడుతున్నారా? బీజేపీని వీడితే.. ఆయన పయనం ఎటు? సొంతపార్టీ పెడతారా? అంతా అంటున్నట్టు కాంగ్రెస్‌లో చేరుతారా? అనే చర్చ జోరుగా నడుస్తోంది. మధ్యాహ్నం 12 గంటలకు షామీర్‌పేట్‌లోని తన నివాసంలో జమున మీడియాతో మాట్లాడబోతున్నారు. అయితే ఆమె ఏం మాట్లాడుతారు..? ఈటల రాజకీయ భవిష్యత్ గురించి మాట్లాడుతారా..? లేకుంటే తన భవిష్యత్ కార్యాచరణ ప్రకటిస్తారా..? అనేదానిపై సర్వత్రా ఆసక్తి నెలకొంది.