వెరీ గుడ్.. లహరి

పెద్ద మనసు చాటుకున్న చిన్నారి
రూ.లక్ష దొరికితే పోలీసులకు అందజేసిన లహరి
అభినందించిన సీఐ పులి రమేష్ గౌడ్
స్పాట్ వాయిస్, నర్సంపేట: చిన్నారి పెద్ద మనసు చాటుకుంది. తనకు దొరికిన లక్ష రూపాయలను బాధితులకు అందజేసి నిజాయితీ చాటుకుంది. వివరాల్లోకి వెళితే.. ఖానాపురం మండలం మనుబోతుల గడ్డ గ్రామానికి చెందిన తేజావత్ కళ పని నిమిత్తం నర్సంపేట పట్టణానికి వచ్చింది. ఈ క్రమంలో తనతో తెచ్చుకున్న లక్ష రూపాయల నగదును పోగొట్టుకుంది. నర్సంపేటకు చెందిన గుడికందుల రవి కుమార్తె లహరికి ఆ డబ్బులు దొరికాయి. వెంటనే ఆ చిన్నారి విషయాన్ని తన తల్లి పద్మకు తెలిపింది. తల్లికూతుళ్లు ఇద్దరూ కలిసి పోలీస్ స్టేషన్ కు వచ్చి తమకు డబ్బులు దొరికిన విషయం సీఐ పులి రమేష్ గౌడ్ కు తెలిపారు. ఈ క్రమంలో తన డబ్బులు పోయాయని తేజావత్ కళ పోలీసులను సంప్రదించగా పోలీసులు ఆ డబ్బులు కళకు అందజేశారు. తనకు దొరికిన డబ్బులను నిజాయితీగా అందజేసిన చిన్నారిని రమేష్ గౌడ్ అభినందించారు.