అంకితభావానికి హ్యాట్సాఫ్..

శభాష్.. మేడమ్..
వృత్తి నిబద్ధతలో మీకు మీరే సాటి..
సీఎం కాన్వాయ్ లో అపశృతి
వాహనం నుంచి జారిపడిన మహిళా పోలీస్ అధికారి..
క్షణాల వ్యవధిలోనే పరుగెత్తుకుంటూ వెళ్లి విధుల్లోకి..
అధికారి తీరుపై ప్రశంసల జల్లు..

స్పాట్ వాయిస్, ఓరుగల్లు: విధి నిర్వహణ అంటే ఇది. అంకితభావం అంటే ఇలా ఉండాలి. కింద పడ్డామని ఆగి చూసుకోకుండా, పడ్డాననే కనీస పట్టింపు కూడా లేకుండా లేచి ‘లేడి’ మాదిరిగా పరుగెత్తిన ఆ అధికారి తీరుపై అంతా ప్రశంసల జల్లు కురిపిస్తున్నారు. తనకేమీ జరిగింది అనేది కాదు.., విధి నిర్వహణే ప్రధానం అన్నట్టుగా వ్యవహరించిన మహిళా పోలీసు తీరుకు అంతా జేజేలు పలుకుతున్నారు. ఒక్క క్షణం డ్యూటీని గుర్తు చేసుకుని, పడినా తగ్గేదేలే అన్నట్టుగా, అలసత్వానికి ఏమాత్రం ఆస్కారమే ఇవ్వకుండా ఒక్క ఉదుటన పరుగున వెళ్లి మళ్లీ తానెక్కాల్సిన వాహనాన్ని చేరిన తీరును మెచ్చుకుంటున్నారు. ఇది కదా అసలు సిసలు పోలీస్ అధికారి విధి నిర్వహణ అంటూ, ఆ మహిళా పోలీస్ అధికారి వృత్తి నిబద్ధతను వేనోల్ల కొనియాడుతున్నారు. వివరాలిలా ఉన్నాయి..

ముఖ్యమంత్రి కేసీఆర్ శనివారం వరంగల్ పర్యటనకు వచ్చారు. సీఎంకు ఘన స్వాగతం పలకడానికి జనగామ జిల్లా సరిహద్దుకు మంత్రులు, ఎమ్మెల్యేలు, యంత్రాంగం భారీగా చేరుకున్నారు. పెంబర్తి కళాతోరణం వద్ద సీఎం కేసీఆర్ కు మంత్రి ఎర్రబెల్లి శాలువా కప్పి స్వాగతం పలికారు. తరువాత ఎవరి వాహనాల్లో వారు ఎక్కే క్రమంలో సదరు మహిళా పోలీస్ అధికారి కాన్వాయ్ ఎక్కే క్రమంలో జారి రోడ్డుపై పడ్డారు. పక్కనే ఉన్న ఇతర సిబ్బంది సాయం చేసేందుకు యత్నిస్తున్న క్రమంలోనే ఆ మహిళా అధికారి ఒక్క పరుగున వెళ్లి తను పడిన వాహనంలో తిరిగి ఎక్కి డ్యూటీ నిర్వర్తించారు. మహిళా పోలీసా.. మజాకా..

శభాష్ మేడం..
గెట్ వెల్ సూన్ మేడం.