వరంగల్​ నిట్​లో స్వైన్​ ఫ్లూ కలకలం

వరంగల్​ నిట్​లో స్వైన్​ ఫ్లూ కలకలం
స్పాట్ వాయిస్, కాజీపేట: వరంగల్​లోని జాతీయ సాంకేతిక విద్యాసంస్థ (నిట్)లో స్వైన్ ఫ్లూ కలకలం సృష్టించింది. కళాశాలకు చెందిన బీటెక్ విద్యార్థిలో జ్వరం, వాంతులు వంటి లక్షణాలు కనిపించడంతో శుక్రవారం రాత్రి హన్మకొండలోని ఓ ప్రైవేటు ఆసుపత్రిలో చేర్పించారు. వ్యాధి లక్షణాలను గుర్తించిన వైద్యులు..హెచ్ 1 ఎన్ 1 పరీక్షలు నిర్వహించగా స్వైన్ ఫ్లూ పాజిటివ్​గా నిర్ధారణ అయింది. ఈ విషయాన్ని నిట్ అధికారులు వెంటనే జిల్లా వైద్యాధికారులకు తెలియజేశారు. అధికారులు మున్సిపల్ శాఖకు సమాచారం అందించడంతో వారు నిట్​లోని విద్యార్థి ఉంటున్న తరగతి గది, హాస్టల్ పరిసరాల్లో శానిటేషన్ చేయించారు. వైద్యశాఖ అధికారులు నిట్ డిస్పెన్సరీలో వివరాలు సేకరించారు. స్వైన్​ ఫ్లూ బారినపడిన విద్యార్థి ఆరోగ్య పరిస్థితిపై ఆరా తీశారు. కళాశాలలో ఇతర విద్యార్థులకు ఏమైనా లక్షణాలు ఉన్నాయా అనే కోణంలో వివరాలు సేకరించారు. కాగా, ఫ్లూ బాధిత విద్యార్థి ప్రస్తుతం ఆరోగ్యంగా ఉన్నట్లు నిట్ అధికారులు తెలిపారు.