పట్టుదలతో చదివి ఉద్యోగం సాధించాలి

పట్టుదలతో చదివి ఉద్యోగం సాధించాలి
పంచాయతీ రాజ్, గ్రామీణాభివృద్ధి శాఖ మంత్రి ఎర్రబెల్లి దయాకర్ రావు
అరూరి గట్టుమల్లు ఫౌండేషన్ ఉచిత శిక్షణ తరగతుల ముగింపు
కార్యక్రమానికి హాజరైన ఎమ్మెల్యే అరూరి రమేష్, పోలీస్ కమిషనర్ తరుణ్ జోషి
స్పాట్ వాయిస్, మామునూరు: పోటీ పరీక్షలకు ప్రిపేర్ అయ్యే అభ్యర్థులంతా పట్టుదలతో చదివి, ఉద్యోగం సాధించి, తల్లిదండ్రుల కలలను సాకారం చేయాలని పంచాయతీ రాజ్, గ్రామీణాభివృద్ధి శాఖ మంత్రి ఎర్రబెల్లి దయాకర్ రావు అన్నారు. అరూరి గట్టుమల్లు మెమోరియల్ ఫౌండేషన్ ఆధ్వర్యంలో మామూనూరు పోలీస్ ట్రైనింగ్ కళాశాలలో ఎస్సై, కానిస్టేబుల్, గ్రూప్ 2, గ్రూప్ 4 ఉద్యోగాలకు వంద రోజుల పాటు నిర్వహించిన శిక్షణ తరగతుల ముగింపు కార్యక్రమాన్ని ఆదివారం నిర్వహించారు. కార్యక్రమానికి మంత్రి ఎర్రబెల్లి దయాకర్ రావు, తెరాస వరంగల్ జిల్లా అధ్యక్షుడు, వర్ధన్నపేట ఎమ్మెల్యే అరూరి రమేష్, వరంగల్ పోలీస్ కమిషనర్ డాక్టర్ తరుణ్ జోషి, జబర్దస్త్ ఫేమ్ రచ్చ రవి, ఇండియన్ రాపర్ రోల్ రైడ ముఖ్య అతిథులుగా హాజరయ్యారు. ప్రభుత్వం 86 వేల ఉద్యోగాలకు నోటిఫికేషన్ ఇచ్చిందని, అవకాశాన్ని యువత సద్వినియోగం చేసుకోవాలని సూచించారు. ఉద్యోగం సాధించడమే లక్ష్యంగా ప్రతీ విద్యా్ర్థి శ్రద్ధగా చదవాలని, వంద రోజుల పాటు మెరుగైన శిక్షణ అందించిన అరూరి గట్టుమల్లు ఫౌండేషన్ పేరు నిలబెట్టాలని సూచించారు. పోలీస్ కమిషనర్ తరుణ్ జోషి మాట్లాడుతూ క్రమశిక్షణ, పట్టుదల ఉంటే ఏదైనా సాధించవచ్చని, అభ్యర్థులు పక్కా ప్రణాళిక ప్రకారం చదివి జాబ్ సాధించాలన్నారు. ఎమ్మెల్యే అరూరి రమేష్ మాట్లాడుతూ వర్ధన్నపేట నియోజకవర్గ నిరుద్యోగ యువతకు ఉద్యోగ అవకాశాలు కల్పించాలనే ఉద్దేశంతో ఉచిత శిక్షణ తరగతులను ప్రారంభించామని, ఇక్కడ శిక్షణ తీసుకున్న వారంతా మంచిగా చదివి ప్రభుత్వ, ప్రైవేట్ ఉద్యోగాలు సాధించాలన్నారు. తను చిన్నతనంలో చదువుకోవడానికి చాలా ఇబ్బందులు పడ్డానని, మధ్య తరగతి కుటుంబంలో పుట్టిన వారి ఆర్థిక ఇబ్బందులు తెలుసు కాబట్టే ఇలాంటి సేవా కార్యక్రమాలను నిర్వహిస్తున్నానన్నారు. కాగా, ముగింపు సందర్భంగా విద్యార్థుల కేరింతలతో పీటీసీ ఆడిటోరియం మారుమోగింది. దీనికి తోడు జబర్దస్త్ ఫేమ్ రచ్చ రవి కామెడీ, ఇండియన్ రాపర్ రోల్ రైడ పాటలు తోడవటంతో విద్యార్థుల ఆనందానికి అవధులు లేకుండా పోయాయి. అలాగే విద్యార్థుల సైతం ఆట, పాటలతో అలరించారు. అనంతరం టీఆర్ఎస్ పార్టీ వర్కింగ్ ప్రెసిడెంట్, మంత్రి కేటీఆర్ పుట్టినరోజు సందర్భంగా మంత్రి ఎర్రబెల్లి, ఎమ్మెల్యే అరూరి రమేష్ కేక్ కట్ చేశారు. కార్యక్రమంలో శిక్షణ పొందుతున్న అభ్యర్థులు, పలువురు పాల్గొన్నారు.